Chawtha

��������

*CHAWTHA*
_________________
30-08-2016

TheAizawlPost:::Mihringte tan ei leh in a pawimawh a, kan ei leh in hi kan hriselna vawngtu, min tihrisela min tihrisel lo thei a nih avangin hnam fing apiangin an ngai pawimawh ti ila thu uar kan ni lo ang. Puar nan ringawt ni lo hrisel nan leh chak nan ei leh in hi ngaih pawimawh tur a ni a, chaw tha kan hriat a tul hle. Mi nawlpuiin kan neih mai theih chaw tha 10 i'n tarlang teh ang.
Carrot

Carrot hi mitin a ngeih a, mitdel tur pawh a veng thei. Puitlingin carrot tlawn khat ni tin pakhat ei sela, vitamin A a mamawh tawk a hmu thei a ni.

Vun tan leh sam tan pawh carrot hi a tha a, natna lakah min veng thei a, ha leh ruh tan pawh a tha hle. Carrot-ah hian vitamin C, B, potassium leh calcium a awm a, heng bakah hian carbohydrates leh fibre a pai bawk a ni.
Bawnghnute

Bawnghnute hi chaw tha a ni a, sap phei chuan 'the perfect food' an ti hial a, mihring taksa mamawh a pai hnem vang a ni.

Bawnghnuteah hian calcium a tam a, ha leh ruh tan te, thazam leh thisen kal tithatu atante pawh a tha a ni. Bawnghnute ni tin no 2 in chuan i taksain protein a mamawh zawng zawng zinga za zela 30 i hmu thei ang.

Bawnghnuteah hian vitamin B, B12, potassium leh iodine a awm a, mahse tun hnai te atang khan mitiamte'n bawnghnute khar ei tam lutuk chuan lung lam tha lo neih a awl an ti a, a chhan chu fats (thau) a tam vang a ni. I in thin a nih pawhin a khar tam lo thei ang berin in thin ang che.

Whole Grains

Grains hi chi hrang hrang a awm a, wheat hi Mizote tan chuan a lar ber awm e. Wheat hi chakna pai tam bera ngaih pawh a ni. Vitamin B, E, iron, potassium, magnesium leh zinc te a pai a ni.

Bean

Bean-ah hian protein a tam a, lung tan a tha. Bean tihro tawhah hian vitamin B, clacium, iron, magnesium leh potassium te a awm a, a hringah hian vitamin A, C leh iron a awm bawk. Bean-a a hrui (fibre) hian cancer natna leh lung lam thalo a tidam thei bawk niin mi thiamte'n an sawi a ni.

Orange-Yellow Fruits

Yellow fruits zingah chuan thingfanghma, theihai leh dawnfawh te hi thei hrisel a ni. Theihaiah hian vitamin A a tam a, nipui laia ei thin hian kum khat chhung vitamin A kan mamawh a hmuh theih an ti. Thingfanghma leh theihaiah hian vitamin C a tam a, thingfanghma-ah hian phosphorus, magnesium, calcium leh potassium te a awm bawk a ni. A hel tui hi digestive aid atan a tha a, sa tih hmin hma nan pawh an hmang thin.

Sangha

Sangha hian protein a pai a, a ruhah hian phosphorus leh calcium a awm bawk. A ruh i ei duh chuan chhum la, vinegar telh rawh. Shark, cod leh halibut te hi sanghaah chuan oil pai tam a ni a, vitamin A&D a pai bawk.

Peanut

Badam-ah hian chakna a tam khawp mai a, protein, carbohydrates, vitamin B leh A te hi a awm a, iron leh calcium te a pai bawk.

Kawlthei
'
Kawlthei hian ngaihsan a hlawh vak lo a ni mai thei a, mahse serthlum pumkhat aiin kawlthei pum khat hian vitamin C a pai tam zawk a, iron pawh serthlum aiin a let thumin a pai tam bawk a ni.

Thlai hring

Thlai hnahah hian vitamin leh mineral a tam em em a, Iron, calcium, magnesium, potassium, phosphorus leh carotene a hmuh theih a ni.

Theite

'Apricot' an tih hi Mizo chuan theite kan ti a, iron leh potassium a pai tam a, a ei thang chuan fuat an ngah a, an chau har bik. Apricot no chanve tih ro hian calories 150 a pai a, vitamin A pawh a pai tal bawk a ni.