He Bible chang ka chhiar apiang hian ka mittui a tla thin. Tluk chhiat hnu Mihring hi Pathian hmaah enge a nih tichiangtu a ni. Pathian khawngaihna mak zia leh Hmangaihna thuk zia hi a hriat theih a ni.
Israel mite chu hetiang hian an tawngtai a: "Aw LALPA, nang chauh hi LALPA chu i ni. Vante leh a chhunga awm zawng zawngte, lei leh tuifinriatte leh a chhunga awm zawng zawng te hi i siam vek a ni. An za-in i vawng tha thin a. Aw LALPA, nang Pathian chuan Abrama i ko va, kaldai ram Ur khua ata i hruai chhuak a, a hmingah Abrahama i sa ta a.
A zui tlat che avangin thuthlung i siamsak ta a, Kanan ram chu pek i tiam a, Hit mi leh Amor mite awmna ram Periz-ho te, Girgas-ho te awmna ram chu, a thlahte awm nan i pek kha. I rinawm a, i thutiam i hlen ta a. Min thlahtute Aigupta rama an retheihzia i hria a, tuipui senah an mangang au i ngaihthlak kha. An lal leh hotute chungah, an ram chungah nen thil mak tam tak i ti teuh va, i mite an tihduhdahzia i hria a ni, tun thlengin i hmingthan phah ta a ni.
I mite tan tuipui laiah kawng i siam a, leicharah i hruai kai kha. Umtute chu tui thukah an pil a, tuipui fawn vela lungtum pil ang vang vang an ni. Chhunah chhum dingin i hruai a, zanah mei engin. Van ata i lo chhuk a, Sinai tlangah khan, i mite chu i rawn bia a, awm dan tur thuruat tha te, Thupek leh Dan nghet te i pe. Sabat ni chu serh tha turin i ti a, i chhiahhlawh Mosia hmangin i dan chu i hrilh. An riltam khan van chaw i pe a, an tuihal khan lungpui ata in tur i pe. An hnena pek i tiam ram chu nei turin i pek kha.
Min thlahtute chu an inchhuang a, an luhlul hle, i thupekte chu an awih duh ta lo va. I thu an awih lo va, thil mak i tihsakte an hre duh lo, luhlul an chhuah a, an hel ta a. Aigupta bawiha hruai lut leh tur hotu an thlang. Lainatnaa khat thinnel i ni a, i ngaidam peih zel a, i thlahthlam lo.
Milem, bawngno lem an siam a, "hei hi Aigupta ram ata min hruaichhuaktu, thil mak tam min tihsaktu kha a ni" an ti. Aw LALPA an va tinawmnah che em! Ngil i neih em avangin thlalerah khan i thlahthlam lo. Chhun leh zana hruai thintu chhum ding leh mei chu i la bo lo. Dawhthei takin i zirtir hram hram a, Mana-in i chawm a, in tur i pe bawk a. Kum sawmli chhung thlalerah khan an mamawh zawng zawng i tum sak a, an silhfente lah a chul thei lo, an keruh pawh a na ngai lo.
No comments:
Post a Comment